Што ќе понуди TEDxSkopje

Бројката од 12 говорници ја одбравме како најобјективна за еднодневна TEDx-конференција. Изборот на говорниците беше направен со помош на јавен оглас за номинирање кој беше објавен во облик на веб-фомулар и споделен преку социјалните мрежи. Од долгата листа на предложени кандидати, по пат на истражувања и интервјуа, се формира конечната група говорници за настанот. При тоа, водевме сметка да вклучиме говорници од различни профили и финалната програма да опфати теми од повеќе области, имајќи ги на ум генералните теми присутни на TED: технологија, забава, дизајн, бизнис, наука, култура, уметност и глобални прашања.

Решивме да дадеме простор на истакнати индивидуи со кои македонската јавност е недоволно запознаена. Сакавме да ги слушнеме нивните приказни, деталите и резултатите од нивните проекти и истражувања и најпосле нивната порака до сите нас. Што е она што тие го сфатиле низ своето професионално или животно искуство, тоа што ним најмногу им значи и која е идејата која сакаат да ја споделат со светот, без разлика дали станува збор за нова или пак, дури и позната идеја која ќе ја реинтерпретираат преку свои примери и на свој специфичен начин, прикажувајки ја во сосема ново и поинакво светло. Како два основни критериуми при изборот ги земавме идејата која говорникот сака да ја приложи, како и способноста тоа да го направи на начин карактеристичен за TED-конференција.

Така, како говорници на TEDxSkopje ќе настапат наши универзитетски професори, етаблирани професионалци, како и талентирани млади луѓе на почетокот од својата кариера. Покрај 12-те говорници, ќе бидат прикажани и 4 презентаци на снимени говори од предходен TED-настан.

Иако TEDxSkopje ќе може да се проследи во живо на Интернет, а самите говори ќе бидат достапни и по конференцијата, оние 100 посетители кои ќе бидат избрани ќе ја имаат привилегијата да ги запознаат говорниците, да разговараат со нив и останатите посетители и да бидат дел од извонредното TED-искуство, во амбиент на споделување и размена на идеи. Со тоа се надеваме дека овој настан ќе придонесе и во формирањето и развојот на квалитетни и продуктивни нови пријателства и соработки.

На сите оние кои ни посочија исклучителни личности од нашата земја, дадоа свои предлози преку пополнување на формуларот или ни помогнаа во остварувањето на контактите срдечно им благодариме за помошта.